中招差啲要入院 張敬軒個唱加場玩新花臣

上月舉行演唱會期間確診的張敬軒，經過個多星期休養後，近日再次投入工作，昨日精神奕奕見傳媒，透露現時身體已沒有大礙，只是有腦霧及間中咳嗽，更搞笑說：「其實我出世已經有腦霧，只係媽咪遺傳嘅係純啲，今次惹番嚟嘅就比較濁啲！」

談到染疫詳情，軒仔表示曾高燒至40度，由於血含氧量低更一度想入院，幸翌日起床後回復正常：「So Far我冇喉嚨痛，只係有鼻水同埋發燒，到好番先咳，到第7、8日已變番一線。」並指未有考究如何受感染。

個唱延至6月補場，問到屆時是否不再接受粉絲送禮物？他說：「都會，因為疫情搞到個人好疲倦，所以我會好珍惜，好似今次開騷，唔知下次幾時再開，見到粉絲送禮物同公仔，我做唔出就咁樣擺喺台上面，但媽咪就打電話嚟鬧我。自己都做過粉絲，追星追過李玟同Whitney Houston，有喺機場等過，仲寫過信畀李玟，等咗10幾個鐘希望佢打畀我，不過佢咁多粉絲，封信可能到依家都未開，所以到我依家收到粉絲嘅信，有回郵信封我會寄番畀佢，如果有寫低電話，我都會搵時間打畀佢。」

他預告個唱將有新元素及新歌衫，亦計劃加場：「如果加場會加喺前面，因為有粉絲話要留番個真尾場。（點解要延到咁後？）諮詢過啲醫生，同埋要配合唔同單位，因為通關之後唔知個疫情會點樣，覺得呢個期比較適合。喺度都想同受影響嘅觀眾講對唔住，我會再睇緊自己多啲，希望粉絲見諒！」

另外，為配合軒仔主演的賀歲電影《超神經械劫案下》即將上映，「譚仔」及「三哥」米線將攜手合作推出特別套餐，軒仔早前更特意穿上戲服試食，引得一眾在場的侍應姐姐大讚他「令仔」，氹得他開心不已！