姚焯菲臨別依依 送花慰粉絲

姚焯菲（Chantel）昨日現身商場活動，梳起孖辮、穿熱褲騷長腿，大晒青春活力，吸引大批粉絲舉牌撐場。談到近日不乏商演工作，問到是否過肥年？Chantel笑言：「唔知自己搵幾多，淨係知道做咗好多商場活動，係好開心同滿足嘅一年。（封大利是畀父母？）我覺得畀佢哋最好嘅禮物就係讀好啲書，如果我能夠兼顧事業同學業，讀到好成績，相信佢哋會好開心。」

早前預告到新西蘭留學的她表示，為配合當地開學時間表，會於農曆新年後出發：「我去到都係讀中學，先打好個底，爸爸媽咪會陪我過去開學，到時我會住學校宿舍。」對於外界指她暫別樂壇，Chantel澄清：「我唔係暫別樂壇，好快會返嚟，等學校有Term Break就返，所以會返嚟見大家。（嚟緊嘅工作有影響？）公司安排得好好，我真係會返嚟。（準備好晒出國嘅嘢未？）都OK，出發之前會同屋企人、粉絲、朋友食餐飯。」