自薦玩《獎門人》 買定底底 何超蓮講多錯多 感情免問

何超蓮、陳瀅、王灝兒（JW）、陳嘉慧、余思霆及彭慧中等，前晚在將軍澳電視城為《獎門人新春感謝祭》擔任嘉賓。《獎門人》一直添食，「獎老」林秀怡寸嘴表示：「又話上一集係最後一集，冇口齒囉！」曾志偉笑說：「唔同，呢集係新春感謝祭。」

玩「坐波波」遊戲時，彭慧中表現勇猛，來回狂衝坐爆了20個氣球，尾段玩到不停喘氣。首次參與節目的超蓮亦毫不錫身，飛身坐到拍檔身上，卻因太輕磅而未能坐爆波，要「獎門人」親身示範。

超蓮過往經常與男友竇驍晒恩愛，近期卻一反常態，連男友34歲生日都沒有發文送祝福，惹來情變揣測。問到其感情生活如何？她笑說：「幾好呀。（傳你同男友分手？）仲傳過我大肚啦，習慣就好。（感情穩定？）嗯。（快啲結婚？）嗯，冇諗住答呢個問題咪『嗯』，好有禮貌答咗呢個問題，哈哈。」講到男友可有求婚，又會否為家姐做伴娘？超蓮對這些問題統統落閘：「下一題。」再問到她與男友的感情是否出現風波？她澄清感情穩定：「冇風波，只係唔想同大家分享，因為講多錯多。（唔講啲人咪亂寫？）唔緊要，冇所謂，反正講咗都係亂寫。（農曆新年同情人節會唔會一齊過？）都話下一題， 情人節會同媽咪過。」

至於講到首次玩《獎門人》表現興奮，超蓮表示這個節目由細睇到大，是她向JW自薦參與節目，當中最怕玩『開口中』，因為連鼻窿也會中忌廉。她自爆今次準備不足，沒有帶備替換衣服，惟有臨時去買即棄內褲：「我玩得嘅，樣衰、污糟都唔緊要，最緊要唔好冷親。」而JW與陳瀅已是《獎門人》常客，同樣玩了3次，她們透露3月拍攝《痞子殿下2》前會先與周嘉洛、朱敏瀚齊齊拍旅遊節目，JW笑言只要衝出香港，任何地方都可接受。