孖「男友」陳湛文歎米線 王菀之迎戰音樂會 淮山雞湯補身

昨日王菀之（Ivana）和陳湛文（Peter）以「銀幕情侶」身份出席「譚仔雲南米線」全新入冬進補之選「雞肉鮮淮山黑蒜清雞湯米線」新產品發布會，剛自日本返港的她亦有關心好友張敬軒在舉行演唱會期間染疫：「我都有輕輕咁慰問過佢，對佢意志力同養生好有信心，希望佢快啲康復，再開番演唱會畀啲歌迷啦。」問她捧場未？她坦言未被安排，而身邊的Peter好奇問是否要自資買飛入場，她就識做說：「一啲啲啦。」隨即相約Peter待軒仔再開騷時齊捧場，不過提醒他：「你要買飛喎！」

Ivana又謂對和軒仔合作的賀歲片《超神經械劫案下》充滿期待，皆因她將大展一身好武功，自詡有功夫底子，拳腳應付自如：「我有好多動作戲，對手係軒仔，不過我啲拳風控制到，一到就會停，但佢就控制唔到，打到我全身傷晒，好在依家冇事。（問佢攞湯藥費？）咁又唔好，所以希望佢盡快康復，之後再算。」

忙完電影後，她又要投入其音樂工作，日前飛抵日本長野拍攝MV：「去咗個好靚嘅森林，行程6日，有3日係做嘢，仲同好耐未見嘅哥哥同佢個仔喺日本倒數，父母、老公都喺香港。（撇低老公？）因為佢有嘢做呀。」而5月時，更要面臨大挑戰，要在2周內舉行共8場音樂會，她透露：「3場係同香港管弦樂，緊接再開5場我從未試過嘅Pop Music Show，全部都係自己創作，所以會攰啲。」笑言要食雞翼及飲淮山雞湯補身。Peter聞言即謂會全家捧場，Ivana大方說會送一張飛給他囡囡，意下之言要他和太太買飛捧場。

至於Peter忙於為《飯戲攻心》舞台劇排練，指跟電影的故事及班底大不同，所以一切都從頭開始，重新摸索。