檳城拍戲 開心多粉絲 高海寧人緣緊要 姻緣不強求

高海寧（高Ling）現正於馬來西亞檳城拍攝電影《鎖戰》，同片演員還有姜皓文及黃浩然。而她於當地甚有知名度，不時都被粉絲野生捕獲，不少人都有將照片放於社交平台，高Ling昨日受訪時謂：「都開心嘅，證明呢度啲人都鍾意自己！」

此外，說到有報道指向來喜歡小朋友的她，渴望40歲前結婚生B，之前更到泰國秘密拜「人緣至尊」，獲贈蝴蝶頸鏈加持，高Ling笑謂：「嗰陣我去泰國拍無綫旅遊特輯，媽咪、爹哋都有過嚟搵我，佢哋喺泰國有朋友，仲載我哋去一個偏遠啲嘅Resort度假，途經呢座廟時，佢哋話呢座廟係旺人緣同觀眾緣，所以就去拜拜，咁啱有班人約咗個僧人喺度祈福，聽講佢唔係成日喺度，泰國朋友話既然咁有緣遇到就一齊去睇吓啦，之後我哋仲同僧人影合照。報道話有條蝴蝶頸鏈，嗰條其實係曼谷夜市有個賣嘢嘅姐姐送畀我，根本唔係咩加持物，識我嘅人都知我鍾意蝴蝶，咁啱得咁橋！哈哈！」

問到她祈求了甚麼，是否一家平安、身體健康？高Ling謂：「無論點樣，受到祝福都係開心嘅，希望真係旺到人緣觀眾緣啦，之後工作順順利利！姻緣都重要嘅，不過呢啲隨緣啦，強求唔嚟嘅！」