阿Dee扮蜘蛛俠遮遮掩掩

男團ERROR成員何啟華（阿Dee）在ViuTV原創劇《心靈師》飾演有多重人格障礙的角色，他表示過足戲癮，同時亦感到壓力：「因為未試過分飾咁多個性格，所以我將性格特質分成8份再放大去演。」他表示曾獲前輩提點：「抽離唔到嘅嘢千祈唔好做！」令他深知處理這種角色時要更清醒。昨晚播出的一集，阿Dee要Cosplay成動漫人物，他笑言試過以低成本扮蜘蛛俠：「有年萬聖節同朋友一齊扮唔同造型嘅蜘蛛俠，我朋友身材靚啲，成件衫直接着唔打底。但係我呢啲身材『驕人』嘅，就唔方便露出嚟喇，所以我係Cosplay着外套、短褲加波鞋，但入面着住套衫嘅蜘蛛俠。」