湯怡擔重任 靠老公提點 容祖兒拉隊撐場 盛讚楊政龍有遠見

英皇一姐容祖兒昨晚偕公司老闆楊受成，連同公司旗下藝人沈震軒、湯怡、曾樂彤、楊天宇、郭思、朱天、黎峻、艾妮及馬思惠等，拉大隊出席支持公司副主席楊政龍（Alex）履任香港青年聯會主席的就職典禮。剛完成世界巡迴演唱會的祖兒得知是Alex的大日子，義不容辭力撐，她說：「見到佢全心全意投入青年事務，有好多新想法會即刻實踐。」同時大讚Alex：「佢係一個好有能力、創意思維同前瞻力嘅領袖，一定會為青年謀福祉。」日前她入場睇張敬軒的演唱會，在台下更跟隨音樂節奏紮紮跳，她叮囑日前確診的軒仔要保重身體，好好休息後再與歌迷大玩特玩。

至於湯怡今次被委以重任，擔任青聯會慶的大會司儀，她坦言壓力很大：「以前都係出席活動多，今次第一次做大會司儀，確實有啲緊張，最怕喺台上讀錯人名同Title，所以返屋企都有瘋狂對鏡練習、背司儀稿。」她大讚老公麥秋成是個很好的練習對象，會與她檢討表現，她笑說：「要慰勞一下呢個幕後功臣，所以呢個假期都帶埋囡囡『麥QQ』去食聖誕大餐，當係呢次司儀工作入面嘅小小心情調劑。」