行程太短擦蟹唔夠喉 Rain約定港迷開騷傾餐飽

韓國巨星Rain昨日到西九文化區為聖誕活動擔任揭幕嘉賓，之後乘夜機返韓國，留港48小時，行程豐富。他透露前晚到佐敦吃避風塘炒蟹，大讚好味，但嘆時間太短，冇時間再食，並稱計劃來港開騷，跟粉絲再傾偈。

Rain旋風式襲港48小時，前晚乘坐最新的山頂纜車欣賞香港夜景，之後吃點心和避風塘炒蟹。昨日他應香港旅遊發展局邀請，為「香港繽紛冬日巡禮」主持「奇趣聖誕村」揭幕禮。穿墨綠色西裝褸襯黑皮褲的他型爆現身，頻頻向觀眾派心心。

「食得好開心」

提到久未來港，他坦言一直想來港見粉絲：「香港係我亞洲巡迴第一站，今次再嚟覺得好開心，好幸運。（尋晚食辣蟹？）係呀，你哋點知㗎？好好味，食得好開心，可惜冇時間再食，做完活動今晚就搭夜機走。今次嚟香港體驗咗好多嘢，想食嘅都食晒，有啲想食嘅餐廳但關咗門。」他嘆今次行程時間太短，加上行李篋細小，放不下香港手信。

親自下廚冧家人

他又稱計劃開演唱會，首站是首爾，知道很多粉絲看過其演唱會和舞台設計，若將來赴港開騷，他最想跟粉絲多溝通：「想傾多啲偈，想有唔同嘅嘢，可能搵DJ合作。（騷肌？）大家到時嚟睇就知。」他表示真心想再來香港，因太掛念這個地方，祝所有人聖誕快樂和身體健康，並用廣東話說：「大家好，我係Rain，祝大家新年快樂。」Rain透露聖誕將與屋企人度過，會親自下廚，並已準備好禮物送給老婆。