暫別家人 返港搵「老公」 陳法拉同家輝親熱 激到喊驚！

張家輝、陳法拉、朱晨麗、劉俊謙與袁富華等，昨日出席新戲《贖夢》開鏡拜神，今次家輝自編、自導兼自演，但笑言野心全無，而劇本已籌備經年。久違了的他與法拉甫合作即扮演夫婦，劇情交代他們被迫面對現實的殘酷，搞到噩夢頻頻兼被精神病纏繞，繼而遇上劉俊謙及朱晨麗的醫療團隊，發生種種經歷，大考演技！

談到與法拉演夫妻，家輝笑言「自肥」：「梗係有親熱戲，好激添！不過係睇到好驚嗰隻啫！（點樣打動法拉接拍？）都係劇本嘅熱誠，佢好夠義氣，唔係對我，係對整個香港。今次台前幕後都提供好高水平嘅工作態度，好開心喺本土拍戲遇到大家都咁幫手，聽到係電影發展基金投資都義不容辭。」

法拉表示今次返港拍戲親切依舊：「大家都好有熱誠，好感動。好多新入行嘅工作人員，一聽到要做嘢都好落力，佢哋係香港電影嘅希望，同埋我真係好想同家輝合作。（暫別屋企人？）佢哋冇返香港，好彩電影分兩段時間拍，可以飛返去同佢哋過聖誕同元旦，然後再返嚟。」

今次是家輝執導的第4部作品，戲種依舊沉重，他說：「拍到一月中，嚟緊都有導演搵我拍喜劇，有啲都可以諗吓。（拍《美斯傳》？）你哋想我拍化骨龍定美斯呀？我唔係足球狂熱分子，但世界盃呢啲盛事都有留意吓，嗰晚因為翌日早班，只係睇咗少少。」

至於袁富華則與劉俊謙扮演父子，談到即將做老襯，他說：「本來定咗日期，但未來老婆腳頭太好，突然多咗工作，加上佢啲家人未返得切嚟，所以可能要延期。依家入咗紙，我都驚有人申請反對，哈哈！」問劉俊謙有否恭喜「爸爸」？他說：「佢咁低調，我都會好低調咁恭喜佢，心底恭喜囉！」