入行多辛酸翻身有翠如蕭正楠夫妻同心聽歌攬住喊

藝人蕭正楠（阿蕭）出席活動，談到入行辛酸被指是「鯉魚翻身」，拍檔區永權即取笑是「翠如翻身」，引得全場爆笑，阿蕭又直言與太太黃翠如聽自己的新歌，會感動得「攬住一齊喊」。

阿蕭、區永權及伍仲衡組成「限定男團」Hea，下月初舉行音樂會，3人昨午現身上水，出席開騷前最後一次的宣傳活動。席間阿蕭感性表示：「好多謝一班粉絲，佢哋手抱咁大就支持我。我今年出道20年，即係佢哋20歲出頭，有啲仲係我參加歌唱比賽嘅時候已經認識。」伍仲衡指音樂會上會訴說他們入行的辛酸，又打趣阿蕭「鯉魚翻身」，區永權即接口：「佢係翠如翻身！」搞到全場忍俊不禁。

受訪時談到「翠如翻身」，阿蕭大方回應：「嘩！金句嚟喎，咁有新歌又有音樂會，係一個好好嘅紀念。（翠如話聽你首新歌《小小大人物》感動落淚。）我哋大家攬住一齊喊添，依家仲有人幫我做歌喎，藉住歌詞又可以同爸爸講番啲說話。（入行20年最大嘅得着係娶咗個老婆？）我識佢又冇20年，不過佢話當年我做歌手，佢有訪問過我，但我完全冇印象。（以往好多辛酸？）OK嘅，同我同期入行嘅好多都冇做音樂，我仲企喺度喎，好開心嘅一件事。」

遺傳父親膽識

3人快歌《Hea到爆》今晨零時推出，忙完今日的電視台節目錄影後便正式閉關，為音樂會作最後準備。區永權透露他們將於演唱會上一展舞技，目前已積極跟排舞師練習，又打趣最擔心伍仲衡屆時的表現，伍仲衡則「膽生毛」表示：「大家6舊腹肌，我一舊先有驚喜嘛，除褲添呀，吹咩？」阿蕭則透露因為音樂會而翻閱家中舊相簿，發現很多亡父照片：「回憶返晒嚟，原來我都遺傳咗佢啲靚仔，同埋佢好有膽識，唱歌走晒音都仲好有自信。」