《繽FUN星網》呈獻《同你霎時衝動》演唱會 江欣燕延續經典 難忘跪拜梅艷芳

東網又有新搞作，由東網及《繽FUN星網》製作兼主辦的首個線上收費演唱會《同你霎時衝動》將於12月18日晚上8時半首播。節目由環星娛樂及旺場協辦，雲集一眾唱得之人，包括江欣燕（欣欣）、蘇姍、姜蓓莉、何婉盈及莫鎮賢，聯同兩大歌王─「廟街歌王」尹光與「電視劇主題曲之王」葉振棠獻唱多首經典金曲，並由著名DJ顏聯武擔任主持，包保聽出耳油。

欣欣、蘇姍及姜蓓莉會演繹已故天后梅艷芳的首本名曲《心債》、《胭脂扣》、《抱緊眼前人》及其參加新秀得獎作《風的季節》，原來3人跟梅艷芳各有淵源。擅長扮嘢的欣欣模仿梅姐出神入化，她直認是鐵粉，受偶像影響而入娛樂圈，更自爆有過一段爆笑追星經歷：「記得第一次見梅姐係我中學時去睇《勁歌金曲》季選，趁廣告時段我衝埋去搵佢簽名，點知畀條電線絆倒，我仆咗喺梅姐前面！哥哥（張國榮）同梅姐講：『有人拜你』，梅姐叫我起身先，又問我痛唔痛，最後仲同我簽名。」她笑言是首位跪拜梅姐的粉絲，續指為了見偶像一面，後來膽粗粗參加新秀比賽，因為當年新秀海選由梅姐與哥哥擔任評判，她說：「唱完之後我留低叫梅姐簽名，哥哥認得我，佢仲話：『之前拜你嗰個女仔』。」

至於蘇姍與梅艷芳的出道經歷相似，同樣早於4歲就展開唱歌生涯，其後參加公開比賽正式入行：「媽媽係唱歌出身，我細細個，佢就帶埋我同家姐一齊喺酒店、夜總會唱歌。講到最難忘係我經常要同家姐着同一款衫表演，但我係細，揀歌衫款式同顏色永遠都係家姐話事，我永遠冇話事權。」她表示雖然與梅姐從未合作，但對方做過座上客欣賞其演出，大讚對方親切又玩得。

而姜蓓莉跟梅艷芳同是第一屆新秀參賽者，對此感到自豪，雖然未有得獎，但獲得經驗及結識到一班好友已是最大收穫，她憶述：「我當年參賽係唱鄧麗君《你怎麼說》，仲着埋旗袍，我當年身材都唔錯㗎！」她表示與梅姐從未合作，但私下會一齊食飯聚會。

12月18日20：30上架首播

12月19日12：00上架重溫

$58線上通行證（首播+限期內無限次重溫）