感動眼濕濕返後台冷靜陳奕迅擒高望觀眾險碌落「山」

陳奕迅前晚開騷時險發生意外！為了拉近和「山頂」觀眾距離，他爬到舞台最高位置打招呼，「落山」時差錯腳險跌倒！由於全晚觀眾太熱情，他一度感動得眼紅紅，要到後台平復情緒！

陳奕迅（Eason）前晚於紅館舉行第5場《Fear and Dreams》演唱會，全場歌迷不斷高呼尖叫，被融化的他除了差點忘詞甩嘴，期間更爬上舞台最高位置跟「山頂朋友」打招呼：「我聽到你哋話想望真啲，我都想望真啲大家！」Eason唱《七百年後》「落山」時於樓梯差錯腳，幸好及時保持平衡不致跌倒，他笑言：「你哋真係太勁，搞到我都亂晒呀！真係……哈哈哈！」

作狀酒精噴口

一口氣連唱29首歌後，他終於停下來發揮「吹神」本色，他笑言：「你哋真係好勁！我想問吓大家會唔會每晚上網搜尋個騷有咩睇？」有觀眾答：「晚晚睇！」Eason說：「我就唔睇嘅，唔怪之得你個樣咁攰啦，哈哈哈。其實最緊要係咩？最緊要係依家，咁早知幾冇癮！」

當Eason用酒精噴手時，更作狀噴口：「唔知點解呢幾年慣咗呢樣嘢，75%酒精，我醉喇！」當他停下來之際，有觀眾不停狂叫，他即說：「我知你哋點解一定要叫，原來真係忍唔到。我都好想近啲大家，好可惜我唔係做緊talk show，有時我真係要好集中，但係隔住個耳機睇到你哋個口郁郁吓喺度叫，搞到我都失魂落魄。」

搞後台「導賞團」

由於前日開始免掃描安心出行，Eason突然問觀眾：「你哋入場仲有冇『嘟』？其實『嘟』唔『嘟』都好啦，有啲嘢慣咗。即係好似我唔出聲，就有人會無端端即刻大叫『EEEEEEE神』！」Encore環節中，部分觀眾開手機燈打造「滿天星海」，令他感動得雙眼通紅，忍淚唱完《K歌之王》，要返後台後冷靜一會才能平復情緒。

另外，Eason在社交網分享後台照，見他逐一欣賞圈中好友包括張學友、張敬軒及謝霆鋒等送來的花牌，又用紙巾抹花，更安排美食慰勞工作人員。