炎明熹被屈扮大牌：我只係一粒塵

炎明熹（Gigi）昨日出席大家樂舉行的《炎明熹好想約你～做善事》慈善捐款活動，吸引逾300粉絲撐場。近日有網民指Gigi耍大牌，要助手搬櫈為她開路，她無奈表示：「我唔知點講，把口喺人哋度，要了解清楚成件事先再講，但大家都有言論自由，所以冇所謂。（你扮大牌？）我只係升斗市民、一粒塵，冇話大唔大牌。（唔係囂張？）呢個字只係出現喺我首歌《焰》入面，同我本人係完全相反，首歌係我另一個人格。」