生日攬囡睇日落 洪永城冷落老婆淆底 向王敏奕求救

洪永城（Tony）、王敏奕、蔡潔與陳曉華等昨日出席無綫劇集《法證先鋒V》宣傳，Tony自稱戲份不多，惟每次出場均與蔡潔相見，非常有緣，更賣口乖指靚女日日見也不會悶。劇中二人有感情線，Tony亦不諱言私底下亦很熟落：「我哋會約食飯，但合作嘅話，今次先係第一次，不過我睇過佢好多電影作品。」提到蔡潔劇中被「生劏」一幕成為熱話！他即笑說：「拍嗰時佢叫啲男同事唔好到場，本來打算帶相機幫佢影輯寫真，不過我識得監製，可以拎到比較Raw嘅相。」

日前39歲生日的他，撇甩太太與女兒二人世界，對此Tony笑說：「我梗係搞得掂，個女無時無刻都要抱，記得拍呢套劇時個女出世，然後我放完一星期假再返去開工，敏奕就話我唔連樣喇！」身旁的王敏奕即笑指他變得很慈父，感覺不同：「平時佢係搞笑搞氣氛，突然間成熟咗，仲會照顧人，成日都笑咪咪。」問Tony「抱女出走」後可有安撫太太？他即向王敏奕請教，王敏奕即說：「咁你唔好太出面，成日集中個女，一返到屋企要錫咗老婆先再錫個女。（你咁識處理家事，係咪準備好生B？）大家唔好等我，順其自然啦！（要等老公？）佢呢排有喺香港陪我，不過輪到我要開劇啫！」

至於正拍攝新劇《異空感應》的陳曉華，表示連日來忙趕廠景，導致嚴重睡眠不足：「有時Load唔到對白，呢排成日Keep住開36個鐘，所以我發明咗個方法解決，就係食黑朱古力，拍完一場食一粒，一日都食咗廿幾粒，食完好亢奮。」