開騷有壓力拍MV捱苦陳奕迅吊高3粒鐘腦充血見暈

相隔9年回歸紅館的陳奕迅，在今晚開騷前夕發布新歌MV，他為MV吊威吔致有點腦充血，更被狂淋黑漿致黑漿入眼，他笑言自己變鱷魚外，更坦言每當為個唱感壓力時，總有人給他窩心鼓勵。

昨日陳奕迅（Eason）發布新歌《人啊人》MV，為表達人生如夢幻泡影，何必有執念的主題，負責執導MV的金像獎新進導演陳健朗利用CG等特技，表達脫離肉體後的Eason穿梭在多維度宇宙之間，帶出貧富貴賤或深淺高低皆是妄心起滅，灰飛煙滅時，心常空寂。開場時見到的白色山丘沙漠，閃進人的心臟世界，原來山丘是Eason的裸體。

《人啊人》由林家謙作曲，Eason直言收到對方的Demo時已非常喜歡，因對方在Demo中唱了一句：「Who we are?」令他想到「人」這個題材。MV花了近20小時拍攝，單是吊威吔已吊了3小時，Eason說有點腦充血見暈，他笑說：「我唔知拍緊咩，好耐冇試過咁拍，不過我信導演！吊威吔都辛苦，我始終冇受過訓練，核心肌群唔夠力，所以成日喺半空中自動後空翻，好彩今次班武指係合作過，佢哋好好，不停教我。」

淋黑漿變鱷魚

在MV中他要被淋黑漿，他笑言變鱷魚：「淋落嚟嘅似芝麻糊、混合類似小朋友玩啲口水膠質感嘅嘢，導演話食得嘅，哈哈。淋咗4、5次，覺得凍，同埋好似變咗條鱷魚，因為黑漿流咗入眼，好似有層霧咁，似鱷魚眼睛灰灰哋。」Eason續說已為個唱提早排舞，並感激大家支持：「啲飛賣得咁好，都有壓力㗎，有時我都會驚一驚，驚自己唔知做得好唔好，但每當呢啲時刻，個天就會派人嚟鼓勵我，例如身邊朋友，或者喺街上面，都有好多鼓勵，仲話：『你啲飛好難買呀！加油呀！』真係好溫暖。多謝大家，咁多人錫我，我會加油做好每一場。」