無懼與男友聚少離多 阿Sa體力急降 有仔趁嫩生

蔡卓妍（阿Sa）、林盛斌（Bob）、湯怡、麥秋成、譚俊彥及林夏薇等，前晚在將軍澳電視城錄影《獎門人開心感謝祭》。阿Sa與湯怡踩住隊友大髀以五星戰隊戰陣出場，大家即起哄要求麥玲玲照做，集多人之力終於將她扶上Bob與麥秋成的大髀，期間她險走光，幸阿Sa機警相救。而阿Sa玩「估野食」遊戲時孭Bob試食，邊嗌重邊叫救命。輪到玲玲俯身試食，穿低胸裝的她身材呼之欲出，「獎老」錢嘉樂笑言：「玲玲帶咗兩個保齡球嚟玩遊戲喎！」

首次參與《獎門人》的阿Sa表示應Bob邀請，玩遊戲時不怕污糟，會享受節目。提到Twins近年經常在內地工作，她透露聖誕節會返內地跟好姊妹鍾欣潼在工作中度過，又稱原定舉行的Twins演唱會因疫情擱置，希望明年22周年有機會實行。問到經常與富貴男友石恆聰分隔兩地，可有被對方投訴？她坦言拍拖5年，感情穩定：「都咁多年，OK嘅，佢都要做嘢，依家去咗睇世界盃，大家要有私人空間，同埋佢識我嗰陣已經知我工作係咁，飛嚟飛去。」

阿Sa透露10月帶媽媽到日本旅行，行到體力不支，故未能「買爆篋」：「依家體力真係唔得，行兩日已經想死，體力下降得好緊要。」記者指她應把握時間有仔趁嫩生，她笑言：「我知，諗吓啦，盡力而為！」

至於湯怡與老公麥秋成一齊玩遊戲，兩人坦言樂於夫妻檔工作，問到可擔心增加拗撬？男方笑言：「平時正常夫妻拗撬都會有，但係每次都係我認錯先，唔係返唔到張床瞓！」湯怡表示：「都係拗啲瑣碎事，係佢唔返房瞓咋，哈哈。」