廠景接外景幾乎捱病陳曉華體虛自備床褥補眠

前港姐陳曉華（Hera）與前輩文雪兒昨日為無綫新劇《異空感應》拍攝外景。近日天氣轉涼，Hera埋位前穿上厚褸保暖，因氣溫下降加上近期拍攝廠景接外景，令她睡眠不足，感到身體更加虛弱。

「跑幾步就回光返照」

被問到可擔心捱病？Hera笑說：「前幾日差啲頂唔住，以為自己會病，但拍攝跑咗幾步，個人就好似回光返照咁返咗嚟。運動好緊要，平時開廠、外景好多時坐喺度，個人會比較沉，郁一郁個人都精神番。」經過新劇磨練，她自覺尚算捱得：「有時得一個鐘休息都費事返屋企，買咗張床褥喺架車度瞓一陣，或者放食飯時會去架車瞌一瞌。」雖然身體疲倦，但她稱揸車時會很精神，所以很安全，並相信稍後只需拍外景就會有多點休息時間。

講到台慶頒獎禮有份角逐「最佳女主角」與「飛躍進步女藝員」獎項，她說：「依家啲信心留番嚟拍劇，因為今次劇集挑戰好大，有好多場口要兼顧，最大嘅挑戰當然係唔夠瞓，所以無時無刻要提醒自己進入狀態連戲，亦有同工作人員講，如果有問題要即刻話我知，等我改善。」