睇生劏戲送飯 黃宗澤影胳肋底 蔡潔嬲到舉中指

蔡潔、黃宗澤（Bosco）、蔡思貝與王敏奕等昨日到深水埗宣傳無綫台慶劇《法證先鋒Ⅴ》，與現場小朋友大玩遊戲兼派禮物，氣氛熱鬧！提到近日蔡潔被「生劏」的戲份成為話題，Bosco笑言播出時正在吃晚飯，故特別拍下蔡潔胳肋底的特寫傳給對方，還大讚老友的胳肋底好靚，會投她視后一票，氣得蔡潔舉中指回應。

蔡潔受訪時哭笑不得：「Bosco真係好核突，佢有Send相畀我，我同佢講我都剃咗成晚毛，佢生日我會送個胳肋底型蛋糕畀佢。（話你豎中指回應！ ）冇，我好有禮貌，係寫英文字，多謝！」對於Bosco揚言投她視后一票，蔡潔讚他有眼光，又稱有提名已很開心，知道自己仍需努力。

提到外間經常指她與視后李佳芯撞樣，蔡潔表示：「唔似，各有各特徵。（介意被人咁講？ ）又冇乜所謂，觀眾睇到嘅嘢，自然有佢哋嘅感覺，記得當年選美時仲離譜，話我似陳煒我都明白，但有人話我似梁競徽，我覺得自己係萬能Key！」

對於內地近日已播出劇集結局，Bosco的角色黑化似留伏線，他表示：「之前都拍咗幾個結局版本，有邪惡嘅笑亦有爆喊，冇諗到最終揀咗呢個留伏線嘅版本。如果開《法證Ⅵ》有得留低，我梗係想參與，有工開喎！」至於思貝憑該劇角逐視后，問到是否開始拉票？她說：「順其自然，今年好多話題劇，希望百花齊放，等將來有更具挑戰嘅角色先再爭獎。」