外套遮遮掩掩 林明禎遊日返港即見肚

馬來西亞女神林明禎昨日出席活動，她表示早前為電影《飯氣攻心》到日本宣傳，順道與家人到東京旅遊放鬆：「喺日本留咗10日，工作之後突然有假期，所以即興叫媽媽同細佬嚟日本會合，好耐冇放過咁長嘅假期。（有冇血拼？）冇，主要同屋企人睇風景、影相同周圍搵好食嘅嘢，因為媽咪都好鍾意食嘢，我食到腹肌都唔見咗。」她笑言是次出席活動也要以外套蓋住肚腩，又表示自己向來不是太喜歡購物，平日穿贊助商送的衣物已足夠，提到今次媽媽與弟弟的旅費及食宿，她坦言由她負責：「唔捨得細佬畀錢，我大佢10年，從小帶大，所以我哋好親，好好笑大家誤會我哋係情侶。（同弟弟咁親會唔會阻住艷遇埋身？）唔會啦！」