唔只蜻蜓點水 周嘉洛游嘉欣激咀 講明冇伸脷

無綫上位小生周嘉洛、花旦游嘉欣及羅毓儀昨日為新劇《羅密歐與祝英台》拍外景，劇情講述羅毓儀被壞人追殺，嘉洛與嘉欣營救她。3人在劇中的服飾相當特別，嘉欣低胸示人，而飾演醫生的嘉洛一身長褸，有型有款，他說：「呢套唔算辛苦，但臨尾兩集有得揸槍，都幾有型！」

兩女反而多動作戲，更打上癮渴望做「打女」，嘉欣說：「動作同揸槍戲都好多呀！今次角色比較叛逆，第一次嘗試『轉槍花』，開劇前都上過武術課，每次4小時，我覺得拍出嚟都OK，有啲說服力！」羅毓儀亦覺得很有挑戰性：「做打女真係唔容易，不過有機會都想試，見佢哋有得玩槍都心心眼。」

演情侶的嘉洛與嘉欣有咀戲，更是從影以來最激情的一次！嘉洛說：「我哋有Kiss戲，有攬攬，有啲人覺得好激㗎！（拍咗未？）拍咗，比蜻蜓點水再耐啲。（咁都話激？）我哋冇用脷㗎！」嘉欣笑言見到嘉洛的正經樣就想笑，嘉洛說：「呢啲女仔好，唔使氹都識笑。（你平時對嗰啲要氹得好辛苦？）我直頭冇啦！」

被喻為「劇王」、「劇后」的嘉洛及嘉欣，是來年最多劇出的男女藝人，2人表示辛苦得來開心，問拍畢會否放假抖抖？嘉洛說：「早排拍到好攰，真係想放假，但呢期想勤力啲賺錢，趁後生搵多啲。」嘉欣則表示已3年多沒旅行：「好想去外地，去邊都冇所謂。」她與羅毓儀是台慶「飛躍進步女藝員」的勁敵，她說：「每一個提名嘅都係好對手！」怎料被嘉洛寸：「你咁行㗎！」她即說：「隨緣啦！做好自己已經OK！」