多次合作零談情 蔡潔文青仙氣 黃宗澤高攀唔起

黃宗澤（Bosco）、蔡潔、郭柏妍及蘇麗珊等，昨日出席新片《驅魔龍族馬小玲》開鏡拜神。今次故事源自亞視經典劇集《我和殭屍有個約會》，由「靈魂人物」陳十三負責改編及執導，扮演「況天祐」的Bosco及「王珍珍」的蔡潔異口同聲表示，角色與原設有明顯分別。

問到如何超越經典？Bosco表示：「交畀十三哥，所有嘢佢一手包辦，想要啲乜佢最清楚。（有冇重溫劇集先開工？）睇咗十幾集。」對於動作場面頗多，他表示：「多到離譜，拍攝時要花好多時間去度位搞CG，同埋今次係我首次戴隱形眼鏡，劇組準備咗一大一細嘅鏡片畀我，單係戴細嗰副已經感到好刮同眼乾，戴咗好阻視線﹗而我『屍化』後嘅造型，大家半夜見到都會嚇窒。」

提到他與蔡潔第6次在作品聚首，Bosco笑言與女方私交甚篤，但暫時仍未正式拍過感情戲：「邊敢呀？佢係文青女神喎！即使今次原設王珍珍係鍾意況天祐，但去到電影版我哋感情線都好少。」而蔡潔表示有粉絲很想看她與Bosco組情侶檔。

而郭柏妍表示很開心拍電影：「開心又緊張，因為之前我係入戲院嗰個，冇諗過自己會出現喺大銀幕。今次我個角色幾特別，廿幾歲時被殭屍咬到，所以一直維持年輕嘅外表，但實際已經六十幾歲。（使唔使打？）要講嘢，哈哈！其實我都想拍打戲，聽蔡潔講會吊威吔，我未試過，都想試吓。」

陳十三再次將《我和殭屍有個約會》搬上銀幕，但卡士人面全非，教不少「殭屍迷」失望，更有網民將兩代馬小玲的長腿作比較，狠批「新不如舊」﹗他表示：「如果仲局限喺以前，好難再創造傳說，演員亦唔係殭屍，佢哋會隨歲月有所改變，如果要承傳，就要由新人接棒。我覺得今次嘅卡士已經幾好。」問到已返港的太太萬綺雯會否現身？他說：「只可以話有驚喜，而且驚喜唔只一個。」