ViuTV節目巡禮 MIRROR獨欠姜濤 劇王Anson Kong要車唔要獎

MIRROR與ERROR昨日出席《ViuTV 2023節目巡禮》，惟姜濤因腳傷留家休息，MIRROR合體缺一，隊長Lokman說：「好似三缺一咁唔齊，打三份冇癮。（姜濤點？）傷口已經埋緊，但要物理治療，佢都有喺Group Update自己狀況。」

談到Anson Lo、Edan、Ian及姜濤入圍《叱咤》「我最喜愛的男歌手」5強，齊齊「圍剿」張敬軒，Anson Lo說：「多謝粉絲用力投票，冇諗攞唔攞到。（驚唔驚好似上年宣布男歌手時咁畀人玩？）有心理準備有類似嘅環節，Stay Alert囉！」Ian接口：「入到5強已經好開心，多謝粉絲身體力行支持心儀歌手。」Edan說：「獎就唔諗嘞，入到5強已開心同榮幸，我仲有好大進步空間，軒公係好有資歷同犀利嘅前輩，隨緣啦。」Jer則被踢出5強：「冇唔開心，做歌都係着重音樂啟發到人哋，獎項只係Bonus。」

Anson Kong兩套劇集《打天下2》及《冰上火花》獲重點推介，當被指是「劇王」，他說：「你哋諗清楚先好問喎，有Stanley喺度，佢先係ViuTV視帝，我只係咁啱時間堆埋一齊，唔係公司嘅安排，都烏啄啄嘅！我最多攞飛躍進步，一係咩都唔要，淨係要架車！」

至於所屬公司大國文化被政府「釘牌」，日後不能再租用紅館，MIRROR異口同聲表示：「隨緣啦，有啲法律上嘅問題，唔可以答住。以後喺邊個場館表演，都要等個報告出晒，法律程序完成先。（之前無綫台慶向舞者致敬，幽你哋一默喎。）尊重放喺心裏面，唔使成日宣之於口，同埋所有工作人員都值得尊重。」

ERROR會上衝落台向觀眾大派禮物，成員193被指倘若ERROR能奪「叱咤組合獎」，會於演唱會裸跑謝票，他「三級」回道：「咁表演啲咩呀？格劍呀？」事後問到有否信心奪「組合獎」，4子坦言暫時信心不夠強：「所以我哋一直搵緊宣傳攻勢去增強威力，193承諾裸跑嘛！」193說：「我想收番裸跑囉，時序上都唔啱，我哋個騷12月中舉行，《叱咤》係明年1月，都未頒獎，好合理地走數，咁一係再開下個騷先裸跑啦！」談到演唱會準備工夫，4子話中有話：「我哋呢個Moment仲Enjoy緊拍劇，我哋好鍾意拍劇，要拍足24小時先得！拍劇嘅效益最大，做綜藝同唱歌係冇用嘅。（咪唔夠時間排練囉？）客觀嚟講一定唔夠，不過時間好似乳溝咁，點擠都擠到啲出嚟。（請鄭伊健做嘉賓？）佢要睇吓個期先。」對於早前於節目內重提揶揄曾志偉事件，期間聲淚俱下，193說：「只得3集，唔夠時間喊。（有人話你想?合作？）絕對唔係，我哋都唔同台，講嗰啲都係標題黨傻仔，鍵盤戰士收皮啦！」