賣外國物業套現 劉心悠一炮過 2千萬買西貢別墅

劉心悠、林愷鈴及陳明憙等昨日到中環出席美容產品活動，早前有報道指心悠斥資逾2,000萬元，首次在港置業，於西貢買下單幢別墅，她大方表示：「我一次過畀錢嘅，因為賣咗外國一啲物業，調番啲資金返嚟。我嚟香港17年，呢件事一直諗咗好耐，趁依家樓市跌，又咁啱搵到間Dream House，前面有小花園，實用性好高，不過暫時未收樓、未開始裝修，所以未知會自住定放租。（諗住用幾錢裝修？）未有概念，不過成間屋裝修都已經好好，只係需要執吓，我最想將個廚房裝修得靚啲。」

提到手臂上有傷痕，要用遮瑕膏遮掩，心悠解釋：「我本來唔識煮嘢食，近期走去學煮法國菜，喺屋企唔小心整親。今次個課程長達8個月，啱啱過咗中期試。（考成點？）滿分15分，我攞咗13分。（嚟緊會飛去法國考藍帶？）或者學吓西餐先，咁快去法國學廚驚畀人笑，況且法文好難，我被扣嗰兩分都係因為串錯字。（煮畀男友食？）將來應該會，依家搵屋企人同鄰居做白老鼠，佢哋投訴『乜又係呢啲』！」

而林愷鈴透露稍後為ViuTV拍攝以冰上曲棍球為題材的新劇：「其實唔講得住，遲啲會有公布。」問到可有做準備工夫？她表示：「依家做緊Gym，但未開始運動訓練。我讀書玩開劍擊，不過呢兩年停咗，自己又鍾意馬術同打籃球。（想搵運動型男友？）坦白講我份人比較宅，鍾意喺屋企Hea，如果搵個運動型，一動一靜可能擦出火花，其實我爹哋同細佬都好鍾意運動！」