因病失蹤 否認被雪 龔嘉欣傳向高層篤背脊 陳瀅呻委屈

龔嘉欣早前在活動上公然寸爆陳瀅，指雙方同歲數，但自言資歷較深，多年來靠自身努力捱出頭。另一邊廂的陳瀅則透露入行多年遇上最委屈的事，曾經遭女藝人向高層篤背脊，據知此人正是6年前與她合作《平安谷之詭谷傳說》的龔嘉欣，故兩人可謂早有心病。由於嘉欣突然消失一陣子，連日前無綫台慶亦告缺席，即惹來被公司雪藏之說，不過昨日她出席商場的聖誕活動時，心情大靚回應傳聞，否認被雪藏，同時自揭身體有毛病。

嘉欣表示剛與一班朋友去日本旅遊一個月，先後去了東京和福岡，雖然台慶前已返港，但因身體問題而未能參與，她說：「因為天生心臟血管問題，台慶需要好長時間，所以公司都好體諒。（即係咩事？）血管位生歪咗，如果要做手術要開胸，屬於大手術，醫生都建議唔好做，呢排就做啲短時間嘅工作，之後都會拍新劇。（身體咁都拍到劇？）都OK，之前《新四十二章》都照拍打戲，但怕大家擔心先冇講。（病發時會點樣？）有時心口痛，要食藥減慢心跳。」

談到《新》劇兩度被抽起，她解釋指劇集與內地同步播映，故需要重新配音及剪接才能播放，問到可有失望？她說：「以公司安排為大前提，只要對部劇好，做演員都會配合。」提到憑《十八年後的終極告白2.0》及《回歸光影頌：究竟天有幾高》兩劇入圍角逐視后，問到可有信心？她說：「一定要對自己有信心，但最開心係套劇令觀眾有共鳴，一齊陪笑陪喊。（對邊套比較有信心？）《十八年》，因為我同Shaun（譚俊彥）喺入面都合作得好好，大家創造咗好多驚喜出嚟。佢又好唔錫身，畀我任打都OK。」談到有指因得罪高層被雪藏，她否認：「公司好錫我，嚟緊已經安排咗拍劇，係一個正能量嘅角色。」