用「最強Body」色誘陳山聰 劉穎鏇睇寫真學擺甫士

陳展鵬、陳山聰、劉穎鏇（Tiffany）及伍樂怡等，昨日出席無綫劇集《超能使者》宣傳活動。席間監製文偉鴻悉心準備多條劇透短片，預告未來一周的劇情，包括喪妻後的展鵬頹爆食「狗飯」、山聰英雄救美幾乎被斬斷手，以及Tiffany色誘山聰，兼穿上比堅尼擺性感甫士，文偉鴻封Tiffany為「最強Body」。

談到參選港姐後首次以比堅尼亮相人前，Tiffany坦言：「我性格保守，唔鍾意騷身材，成件事係大突破。（事前有諗過推？做咩準備工夫？）冇推嘅，因為係呢場戲會牽動更大嘅事情發生。我都係拍之前早兩日先知，即刻戒糖同澱粉質，嗰朝只飲齋啡，睇深田恭子寫真學擺甫士。」稍後劇情交代她險被強姦兼挾持，她說：「因為我嘅衣着攝唔到護墊，拍完都有少少瘀傷。（三點式係底線？）我覺得開播時嘅大露背戲仲尷尬，想澄清番我冇用替身，嗰個係我親身上陣，好難搵到個女替身似我咁高！」至於台慶夜成功向郭富城集郵，她感激記者幫忙「撮合」：「我當自己攞咗大獎，真係好開心，佢嘅表演好精彩，搞到全場企晒起身！」

另外，劇中展鵬喪妻後被拍檔唐詩詠狠摑，更要爬行當街食「狗飯」。拍攝這場戲時正值疫情高峰期，展鵬打趣說：「感受寵物點食飯囉，第一個Take有啲唔自在嘅，第二個就感覺好啲嘞。（擔心染疫？）擔心，但我真係鍾意演戲，而且好多職業比演員危險10倍！」山聰亦形容自己今次「搏到盡」，談到背向遭「電鋸斬手」一幕，他坦言：「呢場戲拍足3日，聽到電鋸聲真係驚，因為喺我背脊傳出嚟，其中一個鏡頭好危險，大家跟住睇吓就知。」

展鵬被問到「狂野擒唐詩詠」戲份時，他笑說：「有得擒佢好開心，勾引到佢喎，拍咁耐戲都未試過，不過係喜劇，老少咸宜。」山聰與Tiffany同樣「埋身肉搏」，他說：「唔係只得佢三點式，我都會除衫，仲要兩場。今次喺戲裏面除得好多。（有『現袋』？）冇！林子善跳艷舞勁啲，我只係騷上身。」