蒙嘉慧返港捧場鄭伊健紅館「起火」 BBQ攞靈感

鄭伊健相隔3年再登紅館舞台，太太蒙嘉慧專程由日本撲返港打氣。舞台設有巨型幕牆，帶來震撼的視覺效果，伊健在3米高的升降台上邊跳邊唱，睇到觀眾嘩嘩聲！

鄭伊健前晚為9場《HERE & NOW EKIN IN CONCERT 2022》演唱會揭開序幕，正在日本讀書的太太蒙嘉慧專程回港，陪老爺一齊捧場，期間不停揮動燈牌，睇得好開心！演唱會以3面台設計，舞台設有超巨型幕牆，以動畫展現城市發展、戰爭導致天崩地裂等世界變遷，效果震撼，每次轉換畫面，現場都嘩聲四起。

伊健以《一個為你甘去蹈火海的人》打頭陣，繼而向觀眾問好：「好耐冇見，大家別來無恙。」Fans大叫：「好掛住你呀！」他坦言在紅館開騷很艱難，談及台上一個鐵桶燃點火種的裝飾，他笑言靈感來自BBQ：「大家係咪好耐冇燒嘢食，啱啱放寬咗，完騷後北潭涌（燒烤場）見。」又指無論世界點亂，都要令自己開心：「每次見到燒烤爐嘅火花，就覺得燃點咗希望。」

「自肥」悼師傅羅文

他先後跟音樂拍檔陳光榮、朱雋言及歌手雲浩影等合唱，因多了「小鮮肉」，笑言成為「謎肉杯麵」。當獻唱《全城效應》，他施展勁度十足的舞功，再一個華麗轉身坐上房車車頭，一輪勁歌熱舞後，他笑說：「好甘呀！要抖抖先。」而升降台突升到3米高，台面看似微微傾斜，但他站得好穩好安全。

及至Encore環節，他笑言要「自肥」，要求唱師傅羅文的《前程錦繡》：「之前羅文紀念騷我冇出席，唔係唔想去，係想喺自己個騷送呢首歌畀佢。」其後獻唱《只會因你唱》時，他感觸得眼濕濕，但表示想大家帶着歡樂離開，接着一口氣連唱多首快歌，令全場High爆。