帶埋妻女美加巡唱 郭富城為無綫賀壽 見恩師敍舊

舞台王者郭富城（Aaron）昨晚在尖沙咀出席大型聖誕亮燈活動，他在改編自20年前作品《戰場上的快樂聖誕》而成的慈善聖誕主題曲《我們的快樂聖誕》的音樂襯托下登場，充滿節日氣氛。身穿熊仔冷衫的他在台上指屆時會帶女兒前來湊熱鬧打卡，而他每年都會扮聖誕老人氹女兒，笑言會趁機向身旁的聖誕老人取經。

Aaron受訪時指今次改編歌曲既為慶祝聖誕節，亦為慈善機構籌款，希望為小朋友帶來歡樂：「一定會帶小朋友嚟，佢哋好鍾意獨角獸，頭先喺屋企，個女都戴住獨角獸頭箍，應承咗會帶佢嚟。」有傳他會為無綫台慶擔任表演嘉賓獻唱金曲，他默認：「暫時唔講得住，等TVB公布，要尊重番TVB。我只可以講一樣嘢，我係TVB出嚟嘅，你就可以知道我個心係點。今年55周年，亦都知道我讀訓練班時候嘅前輩同老師都會出現，我個心好想見佢哋，自從做咗歌手、演員都冇乜機會見番佢哋，今年係好特別嘅日子，所以好希望當晚見到大家。」

問到聖誕節會否舉家去旅行慶祝？他說：「冇咁快，嚟緊要喺香港拍戲，可能過年後或者美加巡迴演唱會成事，到時帶埋兩個女，一家人去美國，等啲Fans見吓佢哋。佢哋都大個，可以睇爸爸表演。」