角逐視帝 有一票打底 陳山聰投資30年 恨攞衣着獎

陳山聰、劉穎鏇（Tiffany）、陳展鵬及劉佩玥等，昨日出席無綫台慶劇《超能使者》宣傳，山聰今年有6套劇推出氣勢強勁，被睇好奪視帝呼聲高，談到上屆視帝兼老友譚俊彥表明會投他一票，山聰笑指有對方一票已足夠：「有視帝投票畀我喎！自己會平常心，起碼唔會冇票先。（擔心幾套劇提名會分薄票源？）如果要我揀都真係好難揀，個個都好似Jaco（山聰兒子），都係親生仔，點揀呢？」相對於視帝，山聰直言恨攞「最佳衣着獎」：「對一個貪靚又鍾意時裝嘅人嚟講，呢個獎好有意義，之前投資咗30年錢喺時裝上面，都夠買層樓，念在我貢獻咗咁多畀時裝界，畀呢個獎我都得啩！」

而展鵬對於劇中有場穿透視衫戲份，被指造型如同天王般，他笑說：「搞吓笑啫，大家覺得似邊個就邊個啦！（驚唔驚畀網民拎番你以前件魚網衫對比？）亞視啲娘嘢？其實係個人問題，唔關亞視事嘅，點講都冇所謂，最緊要大家開心。」

對於今年視帝之爭，展鵬表示每年心態一樣，認為一切交給觀眾選擇：「頒獎禮一定要民選先好睇，要公平公開，觀眾睇得開心自然會投入。（今年山聰6套劇！）有時唔係多劇一定OK，亦未必票房好就會攞獎，要睇角色同演員嘅發揮，所以交畀觀眾選係唯一嘅出路。」

至於今年有4劇的Tiffany，被睇好奪「飛躍進步女藝員獎」，她說：「我都唔敢講，不過幾套劇嘅角色都畀到大家新鮮感，希望觀眾睇到自己有進步。」