七仙羽為《就是青春》學員加持 洪韻騏被狠批 爛桃花纏身

洪韻騏、梁樂童、康志雄、余卓謙等一班HOY TV《就是青春》學員於大埔為節目錄影，七仙羽擔任嘉賓之餘，亦會為眾人加持一吓添旺氣，她謂：「好多藝人畀我加持完都紅晒。（睇好邊個學員？）女仔啲樣差唔多，男仔我睇好康志雄，佢喺咁多參賽者之中，年紀最大同比較成熟，我覺得佢有冠軍相同入梗三甲，同埋佢着紅色，應該係有高人指點過。女仔方面，我覺得洪韻騏唔錯，但運氣爭啲，不過，年紀仲細唔使太擔心。」對於被七師傅話有冠軍相，康志雄笑言：「咁大鑊，希望啦，都有信心。」

至於「炎明熹勁敵」洪韻騏昨與梁樂童在節目中對戰，談到被七仙羽睇好，洪韻騏卻指對方批她50歲才嫁得出，她謂：「佢同我講，我50歲先結婚，依家連拖都未拍，佢仲話會有好多爛桃花，惟有希望事業會好。（運氣爭少少？）我唔覺，去到呢個階段都好好運，希望靠實力補救。」

《就是青春》本來逢星期六晚播出，但有網民發現於節目表中消失，該節目製作人余詠珊解釋因有兩位學員溫曉晴、陳心余近日確診，影響拍攝進度，故決定暫停播出3星期，並會作出節目調整：「節目會改為逢星期一至五，晚上10點半播出，決賽暫定12月17日。我哋會喺節目加入更多綜藝元素，仲轉咗個更大更靚嘅錄影廠拍攝。（連番改動係咪因為收視未如理想？）其實預咗咁做，只係為回應網民意見，所以提早去做。」