讚有誠意 助攻內地市場 高海寧續約TVB：冇包換獎㗎！

高海寧（高Ling）、陳自瑤（YoYo）、邵初與魔術師Louis Yan，昨日在將軍澳電視城為《萬千星輝賀台慶》魔術表演項目綵排，高Ling透露已續約無綫：「年期長長哋啦，公司過去十幾年畀咗好多嘗試我，今次續約亦好有誠意，希望可以同唔同嘅演員、導演合作，拍劇之外希望拍電影。」雖有內地公司招手，但她坦言喜歡無綫包底薪，會較有保障，亦覺得選擇公司，最重要是有自己的存在價值，公司亦會開放讓她到內地發展，故動筆簽約。

近期她趁未開劇上戲劇班，提升自己，問到今次續約可有開出「換獎」條件？她笑說：「我續約冇包換獎㗎！」對於是否以「視后」為目標？她說：「都希望攞獎，但係爭一個機會，希望可以遇到好劇本、好角色，得到觀眾認同，大家覺得實至名歸先有機會攞獎。」講到好友李佳芯傳出新戀情，她表示不知情：「同邊個？我真係唔知。如果佢遇到錫佢嘅男仔都好戥佢開心，佢應該要拍拖，甚至有更好嘅消息，等我問吓佢先。」

另外，今日是YoYo與王浩信結婚11周年，昨日她被問會否慶祝時？她反問：「聽日咩日子？（你結婚11周年！）呢排真係好忙，我淨係記得聽日係巡禮，因為會由朝忙到晚，真係唔記得咗！不過唔緊要，因為佢咁啱仲喺內地拍嘢未返，惟有等佢返嚟先再諗點補祝啦！」她續表示由細到大都希望做魔術女郎，又指今次的表演很高難度及驚險。至於邵初被問到可喜歡識魔術的男士，她笑說：「最好唔好，自己太易畀人呃，如果仲識魔術，我驚自己好易『沉船』。」