身痕再開騷 明年返紅館 郭富城減價撐新血 否認做幕後金主

郭富城、魏浚笙（Jeffrey）、ANSONBEAN及廖子妤等，昨日出席海洋主題珠寶概念店揭幕禮，熱愛揸船的城城透露兩個寶貝女同樣喜歡海，平日也會舉家出海。他又表示受太太方媛影響，開始喜歡鑽飾：「戴完覺得氣場都好啲！（成日送畀太太？）基本上生日都會送，兩個女都有。（幫佢哋儲嫁妝？）呢方面交畀太太，佢依家30幾歲仲係年輕，可能會享受過程先，等到啲女大心態轉變，會同佢哋交換戴。」

城城自2016年後已沒有在紅館開騷，坦言現時踏上舞台也會心癢癢，希望明年下半年成事。對於導演翁子光稱獲K先生借100萬元拍戲，城城否認是K先生：「好直接，我冇投資電影，我會以演員身份支持。我交晒畀經理人處理，佢知點樣調整，如果有新導演，唔會用天價片酬去接。」

至於拍攝英皇電影《超神經械劫案》期間受傷的Jeffrey，坦言靠意志力頂硬上：「成個左邊身、頸椎、背脊同大髀都拉傷晒，有針灸同拔罐治療，好開心終於煞科，拔罐可以拔埋條頸。（驚咗再拍打戲？）愈戰愈強呀！經過今次訓練，就知拍打鬥戲前要拉筋，我比較少做，所以一嚟左踢右踢就整傷咗！」拍檔洪嘉豪踢爆他打傷人，Jeffrey笑言其中一場戲打到楊天宇重傷：「原本佢扮冇事，但見佢拎唔起隻手，要叫急救員捽跌打酒，同食止痛藥。」廖子妤近日頻頻出席活動，被取笑賺錢賺到笑，她說：「做咗10幾年，依家先叫有啲賺錢嘅工作，多啲嚟密啲手。」