日本預支蜜月心急Encore 湯洛雯着手Plan嫁期隨時旅行結婚

湯洛雯（靚湯）、MIRROR成員Anson Kong（AK）及蘇皓兒等主演的電影《忽然心動》前晚舉行首映禮，AK的Fans一早到場霸位，逼滿數層樓！靚湯被問到剛結束的日本之旅，直認男友馬國明同行，記者追問有否造人成功？她冧爆說：「玩得好成功就真！我哋一齊兩年幾，都係首次去旅行，人哋話旅行可以見到彼此真面目。（咁你發現咗佢啲乜？）睇到佢更好嘅地方，尤其佢乜都冇所謂。（感情升溫？）一向冇跌過！」

她透露已有計劃再度二人世界去旅行：「不過佢比較忙。（投訴？）唔會，佢忙啲應該嘅。」談及婚事，她大方說：「依家疫情減退，隨時會發生。（明年？）唔排除，決定咗會同大家講。（旅行結婚？）通咗關，機會好大！」

AK通幾晚頂捱病

至於AK全程戴口罩，他解釋：「拍緊新劇《打天下2》，拍打戲捱咗幾晚通宵，除晒衫打可能又吹親，有啲唔舒服，醫生話扁桃腺發炎，我仲係一條線（指未有確診），大家可以放心。」談到Fans的應援物令台前幕後大開眼界，他笑說：「因為《打天下》嗰時冇試過，今次趁住3日重頭戲就搞吓啦！」又表示希望挑戰開槍戲。

對於隊友姜濤、柳應廷及呂爵安甫闖影壇即成為「千萬票房小生」，AK揚言冇壓力：「冇諗呢樣嘢，因為唔係我可以控制嘅範圍，只能盡力做好演出，總之我享受拍攝過程。」記者打趣指他近日做「脫星」騷肌，他尷尬說：「依家身形冇拍《繩角》嗰時咁好，真係瘦咗好多。（身手好咗？）好打過其他MIRROR兄弟啩！」