美國開騷 感動到喊 菊梓喬入賭場行運 返港確診

菊梓喬（Hana）早前飛到美國洛杉磯開騷，已經兩、三年沒做過大型演唱會的她坦言有擔心過：「出發前仲要整親背脊，成個禮拜都練唔到歌，但當見到全場爆滿，觀眾熱情到好誇張，真係由一開場就唔停咁嗌，我擅長唱慘情歌，本身仲諗住好型，點知差啲畀觀眾搞喊，真係好感動嘅。」

是次行程緊密，凌晨落機即坐3小時車到酒店：「第二日仲綵排咗5個鐘，因為同隊Band未夾過，所以排足咁耐，但一切好順利。」完騷後她與朋友、助手再坐幾小時長途車到賭城、環球片場暢遊，更發了「橫財」：「我本身唔鍾意賭錢，但佢哋話去到賭城點都要幫襯吓，兌咗100美元玩吓老虎機，撳咗兩吓就贏咗300美元，我覺得好叻，咪走去食餐好嘢囉。」

Hana表示美國之行非常開心，但回港做完核酸檢測後，回家竟然收到確診通知，她說：「有啲乾咳，因為以前搭飛機都會咁，好普通，所以冇諗到中招，我助手都冇事，不過我都好勁，第3日就變番一條線，今日已經好番晒，所以明日可以出關。」故今晚在九展一個音樂會也能如期演出。