「篤魚蛋」尾指韌帶裂 陳山聰帶保護套 胸襲劉穎鏇

視帝陳展鵬、陳山聰、劉佩玥、劉穎鏇與林子善等，昨日到觀塘宣傳無綫台慶劇《超能使者》。山聰重演劇中胸襲劉穎鏇一幕，炒熱氣氛。

山聰被發現左手尾指戴上保護套，他說：「之前拍電影《無間一戰》同黃宗澤個替身對打，佢加咗墊做保護，點知我『篤魚蛋』，我諗住敷冰就冇事，但老婆叫我睇醫生，一照磁力共振發現韌帶有少少裂咗，要戴保護套6星期，等佢自然愈合。」

林子善補充說：「我都有份拍《無》片，期間遇到航拍機失控跌咗落嚟，我同黃宗澤都受傷，佢直頭『中頭獎』，好彩我哋抱住個頭咋！（流血？）全身真血同假血混埋一齊！」談到他於《超》劇穿「彩虹戰衣」跳艷舞，他表示不感尷尬：「佢哋有畀T-Back我打底，但我嫌攝住條屁股罅，所以最終冇着。」

至於日前入院的劉佩玥表示已無大礙：「上吐下瀉無數次，所以要入院。本來以為父母會聽到，點知佢哋熟睡，最後係姑媽發現救番我一命，差啲『暴斃』喺廁所！」問到緋聞男友周志文可有探病？她說：「冇，我好快出院喇。（傳短訊？）好多男、女朋友都有，佢係其中一個，總之大家唔使擔心，我希望下次入院係生小朋友啦！」