摸Pet Pet：餵食冬蟲草 望續命3年 朱智賢戒旅行癮 全天候守護愛犬

藝人朱智賢（朱朱）的愛犬Donut陪伴她多年，15年前，當時只得5個月大的Donut跟朱朱由新西蘭返港，雖然家中有養狗，但她與Donut的感情最為深厚。15歲的Donut年紀漸長，體弱多病，肺、肝、腦均出現毛病，眼睛患有白內障，耳朵又聽不到聲音，3年前更不幸患上心臟病，朱朱花費大筆金錢為牠治療，心力交瘁，更連旅行都不敢去，因為擔心Donut出事時她未能陪伴身邊，她說：「3年前佢突然心臟病、肺積水，要住5日醫院，當時我喊到傻咗，覺得佢會離開我。有一次我親眼見佢行行吓突然暈低，我即刻同佢去醫院，當時好驚，之後佢暈過好多次，醫生話佢暈咗未必會醒番，可能就咁就走，搞到我成日發夢見自己同佢做心肺復甦，有時會喊醒，總之依家佢有少少聲我都好Alert，會即刻睇吓佢。」

Donut需要長期吃藥，每日3次，朱朱指每次餵藥時都很心痛，除了西藥，她更餵愛犬食冬蟲夏草及雲芝，希望有助調理其體質，她說：「Brian（男友謝東閔）曾經安慰我，話佢試過養狗有20歲，Donut 12歲時，我曾經許願希望佢去到15歲，到佢依家15歲，我願望佢有18歲就好喇！」