獨家消息：軒仔心痛 幫手𢱑假 吊威吔打到飛起 Jeffrey楊天宇連環傷

張敬軒、王菀之、Jeffrey及楊天宇（Angus）等主演的英皇賀歲片《超神經械劫案》拍得如火如荼，台前幕後合作得相當愉快，早前更齊齊為演員之一的洪嘉豪慶祝生日，場面溫馨。前日軒仔出席活動時，對一眾「小鮮肉」拍檔讚不絕口，更謙稱在他們身上獲益良多，原來他只是「報喜不報憂」，日前Jeffrey與Angus拍攝對打戲時兩敗俱傷，令人憂心。

據悉，劇情交代扮演保安員「企鵝」的Jeffrey與「村民」Angus誓不兩立，展開一場重頭打戲，不但拳拳到肉，更出動威吔輔助，讓Jeffrey起飛腳狠踢Angus！2人為求效果完美，連日來毫不錫身，結果同告受傷，先是Jeffrey大前日拉傷左腳，捱到收工才前往針灸；前日到Angus「接力」，不幸拉傷右腿及附近位置，即時動彈不得，嚇壞工作人員，他同樣堅持完成拍攝才求醫。

Angus療傷後回覆記者：「呢兩日拍緊我哋嘅尾段重要場口，真係好多動作場面，除咗替身事前幫我哋試動作同擺位外，正式拍攝時我哋都想親力親為。今次武指設計嘅動作比較誇張，拉傷真係在所難免，好佩服Jeffrey受傷後仲連踩7小時，估唔到第二日就輪到我喇！醫師話情況頗為嚴重，因為盆骨歪咗，兩星期前我又整傷右手舊患，張生（軒仔）即刻攞消炎藥同活骼油畀我用，太貼心同識得照顧人喇！」