戲份重致精神不振 張敬軒影帝夢碎：唱歌舒服好多！

忙於拍攝英皇電影《超神經械劫案》的張敬軒，昨午特別抽空與粉絲見面，吸引近百歌迷聞風而至，場面墟冚！他甫見記者即忍不住說：「原來唱歌舒服好多，以前都諗過做影帝，依家覺得有個美夢就算！（以後唔拍戲？）都會把握每個機會嘅，只係今次戲份重啲，好多時03通告，即使晚上收8點都唔會第一時間瞓着，所以原本想每日瞓7粒鐘，最終都只係瞓到3、4小時！」

問到是否因此消瘦不少？軒仔慨嘆：「磅數冇乜分別，不過面色差少少，同埋爆晒瘡囉！好彩今次同洪嘉豪仲有魏浚笙等合作得好開心，我都喺啲小鮮肉身上學到好多嘢，知道年輕一代嘅工作方式同想法，呢行係唔可以墨守成規。」他又大讚魏浚笙「勤力唔怕蝕底，保持純真」，態度不可多得。

早前電台大型籃球賽因遷就MIRROR合體而延期舉行，似乎漠視其他歌手的檔期，軒仔甚至因拍戲而被迫辭退隊長之職，交由古巨基接棒，軒仔表示：「我係個人單位啫，反而如果唔等佢哋，佢哋就唔夠人，成唔到軍，大家互相遷就，都係一個遊戲啫。當然我有聽到啲其他聲音，但我真係唔係咁睇囉！」對於電台「放棄」他，他說：「佢哋有同我商量過，不過我拍緊公司投資嘅戲，要對公司負責，坦白講，我連搵錢嘢都推咗。（冇咗好多錢？）冇計，導演見我哋咁努力，已經決定加戲，依家已知一定會超支同延期煞科。」他透露早前已找港隊籃球員幫自己「操波」，如今卻無用武之地，他笑說：「即係好似朋友約食飯咁，今次約唔到咪下次囉！」