堅拒影裸照 黃翠如慶生「破例」有驚喜

翠如昨日現身保育活動，提到生日節目豐富，她表示：「連詩雅同陳自瑤陪我行山，由朝行到晚，去咗保育區，搵唔到車搭，最後要摸黑落山。佢哋好驚，但我唔驚，覺得個經歷好得意，好似探險咁。第二日佢哋又搞咗個驚喜派對，初時呃我話唔得閒嚟，所以先陪我行山，真係用心良苦！」問到老公蕭正楠可有送驚喜？她指已事先吩咐老公不要送驚喜：「我係好怕驚喜嘅人，怕大家為我做太多嘢，老公有陪我行沙灘同食飯慶祝，仲送咗枝我鍾意嘅香水做禮物。其實我哋對於物質都冇乜欲望，之前互送植物，我覺得係最好嘅禮物。」

提到生日當天在社交網晒泳照，翠如否認是大解放：「一啲解放都冇，輯相係我去馬來西亞時，我嘅好朋友幫我影。（網友話你件泳衣冇睇頭，係咪最大尺度？）我係冇睇頭，我冇乜泳衣，因為我唔識游水。」她透露曾為這位好友操刀影裸體孕照，自己則接受不了：「我最有信心係着晒衫。（如果老公揸機呢？）冇咁嘅必要。」問到生日願望，她指過去一年家人與自己都多病痛，故希望各人健康，問到現時身體狀況如何？她說：「身體OK，至於拍劇就隨緣啦，睇公司安排，我知公司想我拍個旅遊節目。」