許廷鏗「錶」誌里程碑講結婚 余香凝傳承珍藏 抱女當健身

每年一度盛事、2022東方表行沙田錦標「時尚煲呔賽馬日」昨日假沙田馬場舉行，一眾時尚名人及明星均悉心打扮到場，為隆重其事，大會邀請余香凝（Jennifer）及許廷鏗（Alfred）聯同東方表行有限公司董事總經理楊衍傑及香港賽馬會管理層主持揭幕儀式，Alfred更獲大會送贈名錶。

講到手錶收藏，Alfred透露最名貴的手錶由品牌所送：「我唔係好捨得買，想喺人生里程碑時買隻手錶畀自己，但人生仲未有里程碑，所以要加油。（點先算係人生里程碑？）可能結婚啩！」而Jennifer自言明年踏入3字頭，也算得上是一個里程碑，正在物色名錶送自己：「作為紀念又好，將來留畀囡囡都好。（自己畀錢定老公畀錢？）希望係自己，但我唔介意佢送多隻畀我。其實我依家買乜都係諗住將來留畀個女，畀個藉口嚟滿足自己嘅購物欲。」

Jennifer早前到韓國出席電影活動，她坦言雖然心掛掛女兒，但同時很開心有屬於自己的時間，笑言雖然在韓國放肆吃喝，但身形沒有走樣，都是拜女兒所賜：「早幾日帶囡囡去主題樂園，佢依家24磅，我抱足8個鐘，所以依家嘅身形（弗）都要多謝佢。」對於獲提名金馬獎最佳女配角，她稱仍未知屆時會否出席，坦言入圍已感難得及開心。

另外，Alfred最近進軍影圈客串電影《深宵閃避球》，他表示看到自己的演出也感尷尬：「其實我都想拍多啲戲，都鍾意拍喜劇，有諗過演啲變態角色，今次拍戲打開咗道新大門，希望電影界可以留意小弟，雖然我入行十幾年，但都只係初哥。」Jennifer即笑指Alfred適合演變態角色，因他外表斯文，演反差大的角色會發揮更好。