香港開電視最大型選秀騷 《就是青春》大包圍攻陷樂迷 打造混合天團搶灘

《就是青春》已於本月8日首播，多位參賽者歌精舞勁，包括精通樂器及唱功了得的梁樂童（Stephanie）、擅長跳Jazz Funk的曾琸庭（Alice）、「Hip Hop及拉丁舞后」陳心余（Wuba），以及精於跳舞及體操、曾為張敬軒演唱會擔任舞蹈員的張鈊貽（VALC）等，大部分學員未正式出道已拍過廣告或赴韓當練習生等，早已見過世面，難怪開電視視他們為「潛力股」，望盡快收歸旗下力捧！據悉，雖然節目將跨年播放至明年1月才結束，但有關方面已有連串大計在醞釀中，包括12月率先打造男女混合天團，以跳唱組合形式於聖誕節左右出道，組合數目與人數未定，會視乎參賽者表現再決定。

另外，開電視本投資2千萬元製作費，但由於想一眾參賽者多作訓練及學嘢，分分鐘超支一倍亦絕不為奇，幸而眾人亦不負所望，經過3個月特訓後，表現比預期理想。製作單位對他們的照顧可謂無微不至，目前已積極籌備新節目《青春家族之我要做生意》，為眾人開拓財路，以真人騷形式安排他們分組作賽，每組以數萬元資本飛往日本辦貨，家品、藥妝、電器等一網打盡，返港後在深水埗特定店舖做售貨員吸客，所得利潤將撥歸他們的「私己錢」，一眾參賽者大有機會賺得「第一桶金」！

不過，參賽者要脫穎而出絕非易事，事關開電視廣邀電視觀眾作「全民投票」，現階段先以已報名到現場觀戰的40名觀眾作評審，其後會擴展至全港市民「一人一票」選出優勝者，故最終入團者絕對是過五關斬六將！

藝人陳柏宇、葉巧琳、曾樂彤及黃靜藍獲邀擔任「YOUnion」，主要負責陪伴及後援，談及男女混合天團，柏宇說：「未試過，咁都會有市場嘅，始終娛樂性唔同，要試過先知，不過入唔到團都唔使氣餒，獨立歌手依然有市場。」他深知要勝出有難度：「有實力都未必一定勝出，因為最終要由觀眾投票，名副其實講觀眾緣。令我最感動嘅係參賽者會為其他人出局而喊，真係做到比賽第二、友誼第一！」曾樂彤大讚參賽者各有特色：「有啲Vocal好勁，有啲係跳舞老師，同佢哋相處嘅呢段時間，我反而學到好多嘢，因為我冇參加過任何綜藝同選秀節目，喺節目入面會見到我好肉緊咁睇住佢哋比賽。」

對於被睇好有潛力加入「天團」，梁樂童開心說：「如果入到團，我真係超興奮，事關我由細到大都好鍾意唱歌同跳舞，所以好期待以組合成員身份企喺舞台表演。」另一大熱、年僅20歲的曾琸庭亦很開心：「我本身好鍾意韓團少女時代，所以以組合形式出道一直係我嘅夢想，同埋一班人一齊唱歌跳舞，相信一定好開心。」