何泳芍獲山友認同胡美貽膽生毛「攀」贏終極野人

無綫真人騷《港女野人》正在熱播，4位港姐出身的美少女昨日參加「終極野人挑戰」，最終由胡美貽成功奪冠，獲節目監製加冕並接受一眾拍檔吻賀，儼如置身港姐總決賽。

J2台全新真人騷《港女野人》4位主持陳若思（Amber）、何泳芍（Honey）、廖慧儀（Jessica）與胡美貽（Nicole），昨日到攀石場接受挑戰。成功勇奪「終極港女野人」寶座的Nicole，被問到是否眾人中戶外最強？她說：「我哋各有擅長地方，落水Honey一定係最叻。」

陳若思跌到慣

Amber補充：「Nicole最大膽唔怕死。（你呢？）我嚟幫大家影相，哈哈！電話有3,955張《港女野人》嘅相。（頭先攀石失手跌落嚟，有冇受傷？）咬到少少個嘴，不過我跌慣，跌多啲個人先會成長，好似踩單車咁，跌多幾次先會愈踩愈好。」

節目已播出多集，贏得外界不少正評，Jessica笑言叫齊親友捧場，Honey則深受感動：「早排我哋去行山，啲山友認得我哋，幫我哋打氣。」又自爆曾與方紹聰行山，但山友們只顧找對方合照，忽略了她，直至節目出街後，山友們才當她「自己友」。談到節目內有不少落淚場面，眾人指Jessica是「冷靜擔當」，只在心裏流淚，Honey說：「Nicole喊得性感，Amber喊得可愛，我喊得健康。」