吳業坤做嘉賓 被嘲猥瑣 吳若希廣州開騷 晚晚變豬頭

吳若希（Jinny）在內地拍完新劇《香港人在北京》後，即到廣州舉行一連三場音樂會，並邀請了戴祖儀和吳業坤做嘉賓，在台上她笑吳業坤：「唔知關唔關個樣事，總係覺得佢有種猥瑣感覺，但今次大家一齊拍劇，我突然發現原來佢有好正經一面，佢嗰種投入認真嘅態度，令我好驚訝。」吳業坤坦言也希望在內地開騷，更會邀顏值擔當戴祖儀這個開心果做暖場嘉賓。

首次作個人音樂會的Jinny開心透露，獲來自不同地區的歌迷來支持：「北京、上海、浙江、成都、澳門都有嚟，算係一個幾特別嘅聚會，好享受呢種感覺，比我想像中輕鬆好多。」今次音樂會有個環節，門口有個「愛我請留言」信箱，去到尾聲她會讀出粉絲給她的留言，她自爆：「每一晚呢個環節都會喊到豬頭。」最令她感動是有粉絲由初中到現在讀大學仍然支持她，也有粉絲生埋小朋友，一家大細來捧場。

離港3個月的Jinny勁掛住一對仔女，今日就返港的她說：「返去就會啜爆佢哋，我要啜到個仔喊為止，佢塊面好大好多肉。（畀驚喜佢哋？）冇得畀驚喜呀，我個女已經知道我返嚟，佢哋會嚟接我，諗起都覺得開心。」可會啜爆老公？她就將老公捉住囝囝隻腳猛啜的片公開，她說：「佢成日咁樣玩佢哋，睇到我都覺得肉赤，叫佢放開個仔，呢啲嘢等我嚟做。」