菁析九型人：《繽FUN星網》揭示偏向第五型理智派 鄧梓峰點石成金 成就郭羨妮

梓峰跟芷菁結緣於1994年的港姐選舉，當年芷菁是參選佳麗，而梓峰是比賽的「山頂司儀」。講到「山頂司儀」這個稱呼，梓峰解釋：「90年代初港姐騷好多時喺紅館舉行，我企喺觀眾席後排位置主持，所以大家都會叫嗰個做山頂位，嗰個位其實都好重要。不過後來開始變質，個位置變得可有可無，我自從1998年就冇再做。（依家恨唔恨做港姐司儀？）依家冇，做騷嚟講，我反而鍾意做啲比較有歷史時刻嘅騷，我最有滿足感嘅騷係當年青馬大橋通車。」

提到1999年港姐冠軍郭羨妮曾經透露當年做空姐時，因得到梓峰的鼓勵才參選港姐，梓峰笑言：「我只係順口。（佢真係贏咗！）咁咪好彩囉！我係覺得佢有個特別氣質，所以就鼓勵吓，估唔到有咁大影響，佢真係成為咗冠軍，開展港姐生涯。」梓峰的長女亭亭玉立，問他會否推薦女兒選港姐？他坦言：「冇諗過。我好自由，佢鍾意咪選囉，你唔畀佢試，佢永遠得個估字，永遠有個問號。」

另外，芷菁為梓峰做九型人格測試，發現他跟陳百祥（阿叻）屬於同一人格—第六型忠誠型，側向第五型理智型。芷菁解釋：「你哋相似嘅地方係對自己喜歡嘅嘢係可以好專門、好叻，不過佢就去咗三號成就型，佢係要成功，你就去咗九型平和型，係比較優閒少少。」芷菁根據對方的九型人格結果，建議梓峰可以轉行做開心導遊，覺得他定能勝任及成功。