獲拍檔祝賀眼濕濕 陳煒無懼婚前受傷 炸到飛起

藝人陳煒、陳敏之與江嘉敏等昨日為無綫劇集《黯夜守護者》宣傳，活動尾聲時劇集監製代眾演員向將成為人妻的陳煒送上鮮花及心意卡祝賀，令陳煒感動到眼濕濕，她說：「好驚喜，咁公開收到祝福係第一次。」她現時仍要為電影《無間一戰》開工，加上又要籌備婚禮，問她可擔心休息少而影響結婚當日狀態？她說：「我冇諗過休息，我尋日開工都拍到凌晨4點，我只係結婚當日攞咗一日假，應該會分兩日食飯。」她又指日前在無預警下要拍攝爆炸戲：「雖然個爆炸係做後期電腦特效，但我要做反應，講我開車門時突然爆炸，成個人向後飛，不過地下得一張榻榻米墊住，我助手擔心我婚禮前受傷，不停叫我小心啲，唔好做咁大反應。」

而江嘉敏因毛囊閉塞令臉部及上半身長滿粒粒，她透露已看醫生，現時要服食抗生素及搽藥膏。對於網民狠批在劇中的聲音作狀兼扮後生感覺難頂，她表示只為配合角色，亦不會因網民批評而不開心。至於敏之早前將幫學生買旗片段放上網而被網民圍插，她解釋：「我喺車入面所以冇戴口罩，我冇戴口罩係我唔啱，下次會留意，至於話捐10蚊太少，因為我習慣用電子支付，我只係得10蚊紙幣。」她希望社會平和些，不要小事化大。

另外，陳煒近日接受無綫娛樂新聞台《星光路上》訪問，罕有談亡父，並一度感觸落淚：「我覺得自己好少時間陪佢，係過唔到自己嗰關。」她透露父親自18歲起每年都會為她拿取「香港小姐」報名表格，又指之前奪得最受歡迎電視女角色，父親都有來慶功，他很開心可以分享女兒的喜悅。