未完全康復 開腔獻唱 炎明熹吞「蛇」還原靚聲

女團After Class成員炎明熹、姚焯菲、鍾柔美、詹天文，昨日與組合草蜢、冼靖峰、張馳豪及鄭裕玲等錄影無綫節目《SHOW出脫毒新作風》。早前確診新冠肺炎的炎明熹（Gigi）康復後首度開腔獻唱，她表示經過一段時間休養，聲帶逐漸好轉：「我好感恩，雖然未好得晒，但呢個階段已經好好。（擔心影響唱歌？）初時有啲，但擔心唔嚟，所以都係順其自然，唔好畀自己把聲太大壓力。（有冇食開聲藥？）我有飲蛇膽成分嘅中藥同蜂蜜水。」並指有向前輩草蜢請教唱歌技巧。

提到她之前在社交網上載新歌《Hat Trick》的跳舞片段，被網民讚可愛，她謙稱：「跳得有啲尷尬，而且我NG咗幾次，最後將呢條跳得唔算太差嘅片放上網，我雖然對跳唱冇乜信心，但都想挑戰吓。」

而草蜢將於10月在紅館開演唱會，他們表示不會預設嘉賓：「總之邊個藝人嚟睇騷，我哋就會即興邀請佢哋上台，唔想咁煞有介事請嘉賓。」又稱想邀請鄭裕玲上台，讚對方有跳舞天分。他們預告演唱會歌單中有數首歌曲從未公開演唱，亦會一如以往獻唱恩師梅艷芳的作品。他們表示不少朋友要求預留前排座位方便握手，但他們強調為保持社交距離，個唱不設「握手位」，只有「Hello位」。