戒掉寡言 學習溝通 陳宗澤關嘉敏戀人未滿 難界定關係

問到性格慢熱的他卻跟一同參加《造星Ⅲ》的關嘉敏（Carman）傳緋聞，他強調：「梗係唔係同佢拍拖啦！（係咩關係？）好難界定，我唔知佢心裏面點樣定位。」又自爆參賽時，感情最好的女隊友是劉若寶：「比賽完喺九展門口等車，佢無端端行埋嚟問『CY，冇有200蚊可以借畀我呀』，我哋就咁開始。我冇問佢攞嚟做乜，即刻畀佢，下次記得就還，唔還冇所謂。」問到可有借錢給Carman？不擅辭令的他嚇到O嘴。

除戒掉寡言外，CY亦要習慣公司安排的「度身訂造」：「我有600幾度近視加散光，公司安排我戴隱形眼鏡，但因為戴咗有框眼鏡十幾年，所以未改到托眼鏡呢個小習慣，諗住遲啲做矯視手術，仲有頭髮都要轉灰白色。」除容貌改變外，他覺得操弗體形最辛苦：「去做Gym操得太勁，去咗廁所嘔。第2次好啲，因為我好易水腫，所以會食兩條蕉、兩個奇異果，屙一轉再飲齋啡，但呢個方法好削胃，唔太建議畀大家。」

問到公司跟歌影兩大猛人古巨基及古天樂關係密切，是否可盡享資源？他卻說：「兩位古生都冇見過真人。（羨慕MIRROR成員Edan同古巨基合唱？）唔會，相信再努力啲有機會輪到我。而另一位古生，我都係聽佢嘅《今期流行》長大，希望有機會合作拍電影，覺得公司有勁資源係令自己進步嘅動力。」