《東張西望》大搞 放眼全球 何沛珈孭三組 多啲嚟密啲手

《東張》近日最高收視達24點，且經常引起網民熱話。有關方面決定於myTV SUPER推出頻道《東張+》，一眾主持包括林溥來、朱凱婷、梁麗翹及何沛珈等昨出席記者會，並即場宣布娛樂主播周奕瑋、王鎮泉、潘盈慧及許文軒加入大家庭。適逢《東張》將邁向5,000集，高層曾志偉及楊永祥等列席，主持切蛋糕儀式。

何沛珈姍姍來遲，原來她趕拍《愛•回家之開心速遞》，加上有份參演的新劇《寵愛Pet Pet》尚未煞科，「何三組」忙個不停。她自爆日前僅得數小時休息時間，依然早起一小時準備：「嗰日《愛•回家》要跳舞，想自己練好啲先。（拍到依家最難忘係乜？）都係嗰場椅子舞，自己着少布咗，仲要喺咁多人面前搔首弄姿。（有冇好似陳思圻咁，被大前輩問候？）冇，大家都對我好好。」

林溥來表示投入《東張》的時間會愈來愈多，幸太太未有詐型：「因為我返到屋企，都好照顧小朋友。（佢發燒喎。）多謝關心，之前都擔心佢中招，一抱起佢就發覺好燙，好彩應該係發骨節啫，已經冇事。」而周奕瑋及王鎮泉等4位娛樂主播，將會主力娛樂及旅遊資訊，潘盈慧表示負責訪問一位女藝人，鮮有地在螢幕「講到喊」，王鎮泉則說：「我會同影帝古天樂、劉青雲及林家棟做短劇，我緊張到唔敢叫停。」