告別環球 度期食散水飯 李幸倪心情靚 享受悠長「嫁」期？

昨日身穿低胸連身裙的Gin Lee為新碟《time ＆faith》舉行簽唱會，獻唱兩首歌《剛好》及《虛榮》外，又為200名歌迷簽名，而排頭兩位的是僅3、4歲的小朋友，可見她Fans層面超廣。

不時向Fans揮手又派心的她，明顯心情靚爆，她透露完成無綫歌唱真人騷《聲夢傳奇2》決賽後，即飛返家鄉馬來西亞正式開始悠長假期，暫未落實歸期。問到是否「放假為名，秘婚為實」，她就話：「工作咗10年，未正式抖過，同屋企人都3年冇見，我係想休息啫。（但你似待嫁喎？）似咩？點解呀，放心，唔係，我係去陪屋企人，見番啲舊同學同鄰居，一個人飛。（同男友關係點？）感情冇事，一切順利。」再問到男友是否已飛抵馬國，她笑住話：「唔好講呢啲。」又說放完長假後定會返港繼續工作，不過年底或明年初的音樂頒獎禮未必出席。

至於她在台上表示今次簽唱會是和環球合作的最後一次時，表現得感觸良多，她坦言曾為不捨同事而喊過，為感激多年來的關照，她正和3、40位同事度期食「散水飯」。

Gin Lee自言依然有事業心，打算在放假期間寫歌，待回港後再籌劃音樂路重新出發，不諱言有多間唱片公司聯絡她，亦不排除自組公司。問到有甚麼條件可打動她簽約？她說：「想自由度大啲，音樂理念一致，我唔係一言堂，可以有商量。」