心急搣甩緋聞 陳瀅轉移視線 爆身邊人冧嘉洛

陳瀅、周嘉洛、朱敏瀚（朱仔）與JW（王灝兒）昨日出席無綫劇集《痞子殿下》的宣傳活動，他們以劇中造型上陣。玩遊戲時，朱仔被熱情粉絲隔口罩錫面，來不及反應的他一臉愕然。

劇集踏入結局周，陳瀅透露約了同劇演員一齊睇結局。提到之前被拍到上陳瀅香閨，嘉洛強調未試過單獨到女方家中。問他是否想試？他說：「我冇興趣，亦冇原因要去。（中秋節去？）中秋都係一班人慶祝。其實我同朱仔、JW之前去佢屋企都係傾套劇同睇劇，咁套劇完咗會少啲上去。」

陳瀅表示隨着劇集完結，2人的緋聞應告一段落，並大爆嘉洛受女同事歡迎：「之前有個女同事專登嚟睇佢做戲。（幕前定幕後？）我忘記咗係邊個。不過佢做戲係幾好睇，有時JW掛住睇佢做戲而忘記講對白。」而嘉洛笑言太專心工作，未有留意。

此外，無綫上周三收視因颱風吹襲，造就黃金時段節目錄得可觀增幅。《痞子殿下》最高收視22.1點，有143.5萬觀眾捧場，升1.8點；《白色強人Ⅱ》最高收視22.4點，約145.7萬觀眾觀看，升2.2點；《愛．回家之開心速遞》最高收視26.4點，吸引約171萬觀眾。而前晚《開心無敵獎門人》最高收視24.2點，《思家大戰 》則有20.3點。