HeHe床戰又咀又摸 周嘉洛遭「夾」擊 驚現「大笨象」

周嘉洛、陳瀅及朱敏瀚等昨日出席無綫熱播劇《痞子殿下》宣傳，眾演員落力玩遊戲。嘉洛事後慘遭大懲罰，滿身被夾滿衣夾，最搞笑是下身突現「大笨象」，不過他面對記者仍大擺甫士，任影唔嬲！他被爆將與「鹹濕國師」黃建東上演床戲，笑說：「都係離唔開畀佢摸手、摸大髀，意識上交代有咀到，拍到我好不安！（有冇試過獲同性示愛？）冇！可能我比較遲鈍，性格比較內斂。」對於《痞》劇一直保持強勢，有20多點收視，更輕微勝過由視帝視后等主演的《白色強人II》，嘉洛與陳瀅異口同聲表示：「咁我哋上8點半檔，吸到一班小朋友，況且收視好講天時地利人和，加上我哋係喜劇呢！」

嘉洛近期經常被拿來與周星馳作比較，問到可有信心提名視帝？陳瀅搶答：「我哋有信心提名最佳組合、最佳劇集同最佳主題曲，不過唔係嘉洛唱嗰隻，而係JW嘅片尾曲。」嘉洛謙稱根本不能與周星馳比較：「佢太經典喇！我不經不覺演出都有佢嘅影子，但真係唔係特別學佢！（連主題曲都唱埋，進軍樂壇？）專心做好演員先啦，唔好搞咁多嘢喇！」

至於朱敏瀚與嘉洛男扮女裝獲一致好評，他表示：「一開劇就拍呢啲戲份先，着上女裝我就上咗身咁投入。我依家曬黑咗，相信5、6年前扮女人嘅話，一定會再靚啲。」他又自爆小時候被媽咪當女養：「佢想生女，點知生咗3個都係仔，我細個留長髮同中性打扮。（有冇心理陰影？ ）好彩冇乜印象，都係睇相先勾番起啲回憶。（你生個孫女畀佢囉！）連另一半都未有。」

另外，無綫昨日公布上周收視成績，《開心無敵獎門人》和《東張西望》同有24.2點收視，有157萬觀眾觀看，成為上周收視雙冠軍，而李思捷主持的《思家大戰》成績穩定，前晚最高收視有21.4點。至於三線劇集收視平穩，《愛．回家之開心速遞》最高收視23.6點，有153萬觀眾捧場；《痞》劇最高收視20.3點，吸引132萬觀眾；《白色強人II》最高收視20.2點，有131萬觀眾追看。值得一提的是黎諾懿主持的全新飲食節目《滿足的味道》，最高收視有17.4點，是近半年該時段收視理想的節目。